Posibilidat di repatriashon pa Venezolanonan riba 21 desèmber 2021.
Willemstad – Ministerio di Hustisia konhuntamente ku Direktorado di Relashonnan Eksterior ku koperashon ku Kònsùl di Venezuela ta hasiendo esfuerso pa por ehekutá e último vuelo humanitario pa aña 2021 Venezuela, dia 21 di desèmber próksimo, si tin sufisiente interes.
Na e momentunan aki tin vários Venezolano na Kòrsou ku debí na diferente faktor ta deseá di regresá nan pais. Un yamada ta bai na personanan ku den pasado a risibí un dekreto di ekspulshon, i ku pa motibu di falta di konekshon komersial no a bandoná pais, pa nan hasi uso di e vuelo aki. Tambe ta urgi personanan ku no a risibí dekreto di ekspulshon i ta indokumentá pero ku no por hasi uso di e trayekto pa ‘Integrashon Responsabel’, pa hasi uso di e vuelo aki pa bandoná pais di un forma boluntario i mantené e derecho pa hasi un petishon di pèrmit den eksterior.
Aktualmente, ainda no tin vuelo komersial entre Kòrsou i Venezuela ku por fasilitá e personanan aki regreso pa nan pais. En bista di esaki, Minister di Hustisia ta den kombersashon ku Kònsùl di Venezuela, pa logra realisá un vuelo humanitario pa dia 21 di desèmber próksimo. E vuelo aki e biaha aki e destinashon lo ta e aeropuerto di ‘Las Piedras’. En bista di e prosesonan pa ehekutá e vuelo, benta di pasashi ta tuma lugá te ku 5 di desèmber 2021!
Pasashinan ta na benta pues te ku 5 di desèmber prόksimo pa 18:00 or di atardi na Curaçao Handling Agent na Pietermaai Parking Mall na un preis di Naf 436,–. inkluso ‘airport tax’. Pa e vuelo aki lo tin un kantidat di lugá disponibel.
Un prueba di tèst di PCR di 48 ora promé ku e buelo, ku ta demostrá ku e persona konserní a tèst negativo pa Covid-19, ta eksigí.
Na yegada na Venezuela tambe tin ku pasa un PCR-tèst. Esaki lo kosta U$60. Pago adelantá di esaki tambe tin ku wòrdu hasi na kompra di pasashi.
Ta bon pa remarká, ku Venezolanonan ku pa un òf otro motibu a drenta Kòrsou na formal ilegal, lo no bini na remarke pa e trayekto di ‘Integrashon Responsabel’. Si e personanan aki disidí di biaha boluntariamente i no a risibí un desishon di ekspulshon anteriormente, nan lo no risibí un desishon ministerial di ekspulshon (verwijderingsbeschikking). Konsekuentemente nan lo no wòrdu prohibí pa regresá Kòrsou denter di 3 aña i lo por hasi un petishon di pèrmit pa estadia legal despues di a bandoná Kòrsou.
Si tin residente di Kòrsou ku ainda ta pegá na Venezuela, nan tambe lo por hasi uso di e vuelo aki i laga kumpra nan ticket serka Curaçao Handling Agent. Si ta personanan ku a risibí un kontesta positivo pa nan pèrmit di estadia, apliká mesora pa e visa di entrada pa asina por risibí visa na tempu.
Den kuadro di desaroyonan pa ku Covid-19 nan lo mester tene kuenta ku e reglanan vigente pa entrada, ku ta deskribí riba www.gobiernu.cw.